| 1 | Jetzt isch halt me die Klöpfleszeit,
drum machet mir uns dra;
mir ziehet durch die freie Welt
und klopfet fleißig a.
|:Mir bleibet it vor d'r Düre schtong,
mir trauet uns ins Haus zum gong,
ins Haus ins Haus.:| |
| 2 | Gott grieß eich, Herr und Frau im Haus,
mir saget eich was vor,
es isch jetzt gar it lang meh aus,
es schtoht scho vor dem Tor
|:die liebe, guete Weihnachtszeit,
wo Himmel sich und Erde frait,
ja frait, ja frait.:| |
| | 3 | Des Jesuskind, des wird jetzt bald
im Kripple wieder sei,
es friert, es isch ihm viel zua kalt,
drum wärmt es fleißig ei.
|:Bringt ehm e Herz voll Lebensgluet,
damit es nimmeh friere duet,
bringt Gluet, bringt Gluet.:| |
|