Vor 25 Johr isch gwä em Mai do hot der Erwin gmoint 's wär fei wenn mer des kennt zamma brenga: Oimol em Monat Lieder senga. Die Idee war wirklich toll, doch war net klar wo na ner soll! Do hot der Max au glei erklärt: 's wär sicher gar net so verkehrt wenn d' Bundesbah für längere Zeit da Bahhof hält für uns bereit. Die Sach hot klappt, der Dag isch komma, wo d' Ursel hot ihr Klampfa gnomma ond Lieder an a Tafel gschrieba, ond mir henn agfanga zu üba. Ja, onser Bauma-Kurt hurra bracht mit sei Handhamonika. D' Elfriede, allen gut bekannt hot Bahhof-Singers en dr Hand. Am Rettichfescht isch mol der Donez komma ond hot mit seiner Frau vorgsonga. Mir senn bald druff - jo niemand saga - zu siebt noch Gmünd em Auto gfahra. Amanda war der große Hit, wenn d' Ursel klampft, sang alles mit.
2 Johr wars no scho recht und schee, doch henn mer denkt, mir wöllt doch mal seh ob mir net könnet em a Nebezimmer oabhängig sei ond koine Kosta macha em Verei. Em Ochsa en der Bahhofsnäh do hots a solches Zimmer gä, wo mer na henn oscheniert gsonga, glacht ond musiziert. Drzwischa ist a neuer Wirt au komma (1975) ond hot der Ochsa übernomma. No wars halt zletschta nemme schee; es hot halt gar koin Abzug gä. Em Wenter wars besonders schlemm - weil mir doch koine Raucher senn. - | |
Nach 9 Johr hemmer lang berate; 's wär vielleicht doch gar koi Schada; beim Knödler amol azuhöra, ob mir em Nudelzimmer dätet störa. Do hemmer gwiss koin Fehlgriff do, denn d' Susi secht au glei "ha jo". Net bloß, daß mer dort guat ißt ond drenkt, au d' Wirte manchmal mit der Klampf mitsengt. Wia hemmer ons
jetzt uffs Senga gfreut ond s'kamet au recht viele Leut, vor allem mit Klampfa, des war schee mir henn gsonga dia höchste Tö. Frau Krüger kam ond au Herr Möller, doch Frau Lüttke spielte noch viel schneller, wenn sie sang das Lied vom Harung, der da hat ja sei Erfahrung. Der Ehmers Fritz, des muaß mer saga a kräftige Stemm er hot in seiner Lage. Dromm henn mer ihn vor 18 Johr zom Singwart gwählt in onsern Chor. Zur Urlaubszeit waret mer scho froh, wenn koiner mit 'ra Klampf war do ond na der Theo oder Fred zum Senga zur Unterstützung d' Mundharmonika mitbrengat. Doch seit a paar Johr und des ischt bsonders fei hat Heinz und Irene sich gschtellt ei. Viel Lieder henn uns glernt dia zwoi; nur schad, se kennat sei net jedesmal drbei. 's isch wirklich gar koi Schnapsidee Mir fendet Senga oifach schee.<zurück> |